WWW.GUJARATBUREAU.COM

નીડર અને નિષ્પક્ષ સમાચારો ની સરવાણી એટલે " ગુજરાત બ્યુરો "

ભારતની મંજૂરી વિના જળસીમામાં પ્રવેશ મામલે US ઢીલું પડ્યું

ભારતીય દરિયાઇ એક્સ્ક્લુઝિવ ઇકોનોમિક ઝોન (ઇઇઝેડ)ની અંદર ગત અઠવાડિયે અમેરિકાના નૌસૈનિક ઓપરેશન કરવાને લગતા થયેલા મતભેદમાં અમેરિકાએ તેનો સુર હળવો કર્યો છે. તેણે ભારતની પરવાનગી વગર તેની કવાયતને લક્ષદ્વીપ નજીક અંજામ આપ્યો હતો. જે અંગે ભારતે રાજદ્વારી માધ્યમો થકી વિરોધ નોંધાવ્યો હતો.

અમેરિકી સંરક્ષણ મંત્રાલયના પ્રવક્તાએ કહ્યું હતું કે ‘સાત એપ્રિલે અમેરિકી નૌસેનાના સાતમા કાફલામાં સામેલ પોત USS જ્હોન પોલ જોન્સે હિન્દ મહાસાગરમાં રૂટિન ફ્રીડમ ઓફ નેવિગેશન ઓપરેશન કર્યું હતું. આ ઓપરેશન આંતરરાષ્ટ્રીય કાયદા તેમજ દરિયાઇ આઝાદી માટે લાંબા વખતથી જારી અમેરિકી સમર્થનને દર્શાવે છે.’ પ્રવક્તાએ ઉમેર્યું કે ‘અમે સમગ્ર ભારત-પ્રશાંત વિસ્તારમાં ક્ષેત્રીય સુરક્ષા સહિત અનેક મુદાઓ પર ભારતની સાથે ભાગીદારીનું સન્માન કરીએ છીએ.’

અમેરિકી સંરક્ષણ મંત્રાલય પેન્ટાગોનના પ્રેસ સચિવ જ્હોન એફ. કિર્બીએ વિધ્વંસક પોત જોન્સ દ્વારા કરવામાં આવેલા અભ્યાસને ‘નિર્દોષ અવર-જવર’ ગણાવ્યો હતો અને સંકેત આપ્યો હતો કે સૈન્ય અભ્યાસ કરવામાં આવ્યો નથી. દરિયાઇ મામલાથી જોડાયેલા હાલના મતભેદો સહેજ પણ અસમાન્ય નથી કેમ કે ભારત તેમજ અમેરિકા કવોડ ગ્રૂપિંગના સભ્ય છે, જે આંતરરાષ્ટ્રીય જળમાર્ગો પર ફ્રીડમ ઓફ નેવિગેશન પ્રત્યે કટિબદ્ધ છે. ક્વોડ ગ્રૂપિંગમાં ભારત અને અમેરિકા ઉપરાંત જાપાન અને ઓસ્ટ્રેલિયા પણ સામેલ છે. 

ઉલ્લેખનીય છે કે યુએસએસ જ્હોન પોલ જોન્સે લક્ષદ્વીપ નજીક ફ્રીડમ ઓ‌ફ નેવિગેશન ઓપરેશન કર્યું હતું, જે ભારતીય દરિયાઇ સુરક્ષા નીતિની વિપરીત હતું. નીતિઓ મુજબ આ પ્રકારના અભ્યાસ માટે ભારતની મંજૂરી જરૂરી છે.